Eusko Jaurlaritzaren Hezkuntza Sailak “freskoetan espezializatzeko” programa aitzindaria jarri du martxan Lanbide Heziketa Dualaren barruko hezkuntza-eskaintzan. Gaur jarri da abian programaren lehen promozioa, eta hurrengo urteko ekainean lortuko dute titulua lehenengo espezialistek.
Sukaldaritzako eta Gastronomiako erdi-mailako teknikariaren tituluan txertatutako espezializazio-programa bat da. Lanbide Heziketako Ezagutzaren Euskal Institutuarekin (IVAC-EEI) eta Leioako Ostalaritza Eskolarekin elkarlanean zehaztu da programa, eta guk aktiboki parte hartu dugu ikasleen gaitasunen profila diseinatzeko garaian. Zehazki, zentroko prestakuntza eta tutore batekin egiten diren ordainpeko praktikak konbinatzen ditu espezializazioak, bi alorretako gaitasunen ikaskuntza integratzeko. Prestakuntza akademikoa Leioako Ostalaritza eskolan irakatsiko da. Zikloko bigarren ikasturtetik aurrera, gure dendetan egingo da alderdi praktikoaren % 75. Hirugarren ikasturtean, prestakuntza praktikoaren % 85 egingo da EROSKIn, eta gainerako % 15a Leioako Ostalaritza Eskolan.
Titulazio berriak ekoizpen-sarea espezializatzeko eskariari erantzun nahi dio, eta programan parte hartzen duten ikasleen enplegagarritasuna ere hobetu nahi da. Era berean, laneko irtenbide berria ematen die sukaldaritzan aritu nahi direla argi ez duten zikloko ikasleei.
“Merkataritzaren sektorean, gaur egun, beharrezkoak dira freskoetan espezializatutako langileak, eta Lanbide Heziketan hori sustatu nahi dugu. Espezializazio aitzindari hori laneko merkatuaren premietara egokituta dago, sektore estrategiko batean (hau da, banaketarena), eta beraz, laneko merkatuak proiektatzen duen profesional espezialisten eskari gero eta handiagoari erantzungo dio“, azaldu du Eusko Jaurlaritzaren Hezkuntza Saileko Teknologia eta Ikaskuntza Aurreratuetako zuzendariak, Ricardo Lamadridek.
“Gaur egun, merkataritza baino gehiago, elikagaigintza izaten da freskoetako profesionalek lor dezaketen prestakuntzaren ardatza, eta horregatik, gure langileak prestakuntza jarraituaren eta profesionaltasun-ziurtagirien bitartez prestatzearen aldeko hautua egiten dugu enpresok. Espezializazio berriak, zalantzarik gabe, gure sektoreko premia ezkutu bati erantzuten dio. Urrutira joan gabe, zenbatesten dugu datozen urteetan espezializazio horretan prestakuntza duten 400 profesional baino gehiago beharko ditugula datozen 10 urteetan EROSKIn soilik; izan ere, kontsumo handiaren protagonista bihurtzen ari dira freskoak. Hori horrela, ekoizpen-sarearen eta kontsumitzaileen beharretara egokitutako talentua sortu behar da. Pertsona taldeen gaitasunak indartzea, lehiakortasuna hobetzeko: hori EROSKIn dugun lehentasunetako bat da”, baieztatu du gure Gizarteko zuzendari nagusiak, Iñigo Eizaguirrek.
“Sukaldaritzako eta Gastronomiako ziklo teknikoak zerikusi handia du freskoetako espezialistekin; elikadurarekin eta osasunarekin lotuta dago guztia. Espezializazioak programako parte-hartzaileen enplegagarritasuna hobetuko du, laneko merkatura oso egokituta dagoen irteera baten bitartez”, nabarmendu du Leioako Ostalaritza Eskolako zuzendariak, Ibon Andrakak.
