Adin honetako umeetan, gaixotasun zeliakoaren seinale kliniko ohikoenak dira distentsio abdominala (tripa handia, zuk adierazi bezala), zirindu kronikoa, jateko gogo falta, gorakoak, min abdominala, apatia eta malnutrizioa, besteak beste. Pediatrarenera joatea gomendatzen dizugu, eta zeliakia diagnostikatzeko behar beste datu kliniko eta analitiko badago, gastroenterologia pediatrikoaren zerbitzura bidaliko du diagnostiko seguru bat lortzeko. Gaixotasun zeliakoaren diagnostikoa azterketa kliniko zehatzaren eta odol-analitikaren bidez egiten da. Diagnostiko segurua lortzeko, nahitaezkoa da heste-biopsia egitea: goiko heste meharreko ehunaren lagina ateratzea kaltetuta dagoen ikusteko. Proba hau egiteko, ez da kendu behar dietako glutena, kaltea eta sintomak ez ezkutatzeko. Ezinbestekoa da zeliakia behar bezala diagnostikatzea, beharrezkoak ez diren dieta murriztatzaileak ekiditeko eta elikadura-eredu egokia ezartzeko gaixotasuna berretsi denean. Espainiako Zeliakoen Elkarteen Federazioak (FACE) informazio ugari eskaintzen du.

Elikagai-gehigarri guztiak, karameluetan edo gozokietan erabiltzen diren koloragarriak barne, erabat seguruak dira kontsumitzen diren dosietan. Adituen batzordeek egindako kontrol zorrotzak pasatu behar dituzte, prozedura gogorretan oinarrituak, populazioa edozein arriskuren kontra babesteko epe laburrean, ertainean edo luzean. Informazio gehiago jasotzeko, Elikadura arloko Segurtasunaren eta Nutrizioaren Espainiako Agentziaren (AECOSAN) esteka hau sakatu: https://www.aecosan.msssi.gob.es/AECOSAN/web/seguridad_alimentaria/subdetalle/aditivos_alimentarios.htm
Izan ere, umeek jaten dituzten gozokien arrisku nagusia da haginetako txantxarra. Espainiako Dentisten Elkargoko Batzorde Nagusiaren arabera, haginetako txantxarrari dagokionez, Europako kopuru handiena daukagu, eta tratamendu egokiak jasotzera odontologoarenera gutxien doan herrialdea gara (txantxarren %53 eta %65 tratatzen dira bakarrik). Ume gehienek haginetako txantxarren bat daukate. Beraz, koloragarriez ez kezkatzea (lehen esan bezala, ez dute zure alaba arriskuan jarriko) eta zure alabak azukredun elikagaiak ahalik eta gutxien jatea gomendatzen dizugu. Edozein kasutan, haiek jan ondoren, garrantzitsua da haginak garbi ditzala pasta fluoratu batekin. Horrez gain, ez ahaztu, noizean behin errebisioak egin behar direla.