Hasteko, gasak ekoiztea normala ez ezik, desiragarria dela ere jakin behar duzu. Izan ere, heste-osasun on baten seinale da egunean 10 eta 20 gas igortzea, gure hesteak flora ona duelaren eta sabel-hustearen erritmoa hobeto mantenduko delaren proba da. Landare-jatorri elikagaietan dieta aberats batek gas gehiago ekoizten ditu; gogaikarria izan badaiteke ere, txarragoak dira elikadura mota hau prebenitzen laguntzen dituen gaixotasunak: kolon-minbizia, diabetesa, hipertentsioa, hiperkolesterolemia, gehiegizko pisua eta obetsitatea, ezbehar kardiobaskularra, etab.
Orain bai, gas kopurua oso handia bada edo mina sortzen badu ahorakin baten ostean, baliteke landare-jatorriko elikagai gutxi prozesatuen kontsumoa (batez ere, osoko zerealak, lekak edo fruitu lehorrak) handitzeagatik izatea. Hori gertatzen da heste-flora ez dagoelako ohituta zuntz dietetikoaren dosi handiago batera. Haren kontsumoa poliki-poliki handituz gero edo eguneroko otordu guztien artean banatzen badugu, tolerantzia hobea izango da. Lagungarriak izan daitezkeen beste aholku batzuk dira: lekak behar bezala sukaldatzea, ahorakinak banatzea, behar bezala mastekatzea, edari karbonatatuak saihestea eta erretzeari uztea (ohitura hori edukiz gero). Hala eta guztiz ere, gas-ekoizpena handiegia bada eta traba sortzen badizu, jo medikuarenera eta dietista-nutrizionista baterenera, zure kasua azter dezan.

Gizakiaren immunitate-sistema osatzen dute mikroorganismo infekziosoen kontra etengabe aurka egiten duten (esaterako, bakterio edo birus batzuk) zelula batzuek (leukozitoak edo globulu zuriak). Immunitate-sistema ahuldu egiten bada, gaixotzeko aukerak handituko dira.
Lehenik eta behin, txertatze-egutegia egunean dagoela egiaztatu behar da; gripearen kasuan, arrisku-taldean bazaude jakin behar da.
Bigarrenik, higiene pertsonala infekzioak prebenitzeko neurri nagusienetarikoa dela kontuan eduki behar da. Izan ere, hoztura arrunta prebenitzeko neurririk eraginkorrena da eskuak maiz garbitzea.
Elikadurak ere gizakien immunitate-sistema behar bezala funtzionatzen mantentzeko eginkizuna du. Ez dago ziur C bitaminak (laranja, marrubiak, kiwia eta abar bezalako frutetan dagoena) hoztura sendatu edo prebeni dezaketenik, nahiz eta askok horrela uste. Hala eta guztiz ere, badakigu bitamina honen defizita duen dieta batekin, hotza harrapatzeko joera edukiko dugula, C bitaminak immune-sistemaren egoera ona mantentzen laguntzen duelako. Bitamina hauen ahorakin-gomendioak estaltzeko, nahikoa da egunero fruta eta barazki gordinak jatea (ahal bada, bost errazio talde biren artean), bitamina hori erraz suntsitzen baita beroarekin, hau da, sukaldatzean. Elikadura orokorrari begira, hau egitea komeni da: osoko zerealak kontsumitzea finduen ordez, leken eta fruitu lehorren kontsumoa handitzea, oliba-olioa gehitze-koipe gisa erabiltzea. Horrela, gure immunitate-sistema egoera onean manten dezakegu epe ertainean eta luzean.

Medizina modernoak, minbizia bezalako gaixotasun larria arrakastaz tratatzea ahalbidetu duenak, ez dio sinesgarritasunik ematen zuk aipatzen dituzun liburu jakin batzuei. Osasunarekin loturiko erabakiak hartzeko orduan, osasun-profesionalek alorreko batzorde-adituak dauzkaten erakunde ospetsuetara jotzen dute. Gainera, erakunde horiek ez daukate inolako interes-gatazkarik. Estatuan, Minbiziaren Aurkako Espainiako Elkartea (AECC) da, liburu horretan azaltzen diren teoriei inolako baliorik ematen ez diena (bere webguneko informazioan egiazta dezakezu). Ez da egia fruta otorduak baino ordubete jateak edo oheratzea baino bost ordu baino lehen jateari usteak osasunarekin lotura duenik. Era berean, ez dira dieta osasungarriaren parte, eta ez dute kolon-minbizia edo bestelako minbizia prebenitzen, eta are gutxiago hura tratatzen. Aldiz, gure dieta barazkietan oinarritzeak eta animalia-jatorriko elikagaiak, batez ere haragi prozesatuak, murrizteak kolon-minbizia agertzea prebenitzen duela frogatuta dago.
Edozein kasutan, liburu mota horien benetako arazoa da desoreka dietetiko argiak sor ditzaketen aholku faltsu asko ematen dituztela, gaixoari tratamendu konbentzionala bertan behera uztera zirikatzen diolako (eta badakigu horrek ondorio oso desatseginak dakartzala), etab. Zure arrebaren elikadurari buruz zalantzarik baduzu, galdetu onkologoari edo dietista-nutrizionista bati.

Zure senarrak bere burua gosaltzera behartuko balu, ondoez digestiboak ager daitezke bere burua jaten behartzeagatik. Bihotzerreari dagokionez, errefluxu gastroesofagiko edo pirosi gisa ezagutua, adituek gomendatzen dute bizimodua eta elikadura bereziki hobetzea, elikagai jakin batzuek ondoez horiek sustatzen dituztelako. Nolanahi ere, badaude lagungarri suerta dakizkiokeen aholku batzuk:
Zure senarrak erretzen badu, garrantzitsua da hori egiteari uztea: tabakoak urin gastrikoak (oso garratzak direnak) urdailetik esofagora ateratzea eragozten duen balbula kaltetzen du eta bihotzerre-sentsazio hori sortzen da.
Elikagai batzuk saihestea komeni da: pikanteak, produktu garratzak, edari karbonatatuak (gasdunak), txokolatea, edari alkoholikoak edo kafea.
Onuragarria izan ohi da askotan kopuru txikiak jatea. Koadroa larriagotzen duten janari ugariak saihestera laguntzen du.
Horrez gain, sabel-ingurua estutzen duten arropekin janztea saihestu behar da, urdailaren goialdea kontrolatzen duen balbulan presioa eragin dezakelako.
Ez da komeni jan eta jarraian oheratzea (hobe da hiru ordu itxoitea) eta, oheratzean oheburua 15 cm igotzea.
Kasu batzuetan, aurreko ezerk funtzionatzen ez badu, nahitaezkoa da botikak erabiltzea, baina aholku horiek jarraituz, eta medikuak edo dietista-nutrizionista batek ematen dituenak.

Elikagaien Segurtasuneko Europako Agentziak (EFSA) baimentzen du, urte batzuetatik hona, anoa bakoitzeko, gutxienez, olotik edo garagarretik eratorritako beta-glukano gramo bat daukan edozein elikagaik ondorengo osasun-adierazpena eramatea: «odoleko kolesterol maila normalak mantentzen lagun dezake». Beharrezkoa da, EFSAren arabera, fabrikatzaileak zehaztea efektua egunean gutxienez hiru gramo beta-glukano kontsumitzean lortzen dela. Nolanahi ere, nahiz eta egunean hiru gramo beta-glukano hartzeak odoleko kolesterol mailak mantentzen lagun dezakeela egia izan, horrek ez du esan nahi bizimodu on bat jarraitzeari uko egin diezaiokegula: elikadura osasungarria, ohitura toxikoak uztea (behar balitz) eta jarduera fisikoa.
Kolesterol altuak gaixotasun kardiobaskularra jasateko arriskua handitzen du; izan ere, urtean 2,6 milioi heriotzekin lotuta dago, Osasun Mundu Erakundearen arabera. Beraz, diagnostikoaren ondoren egin behar den lehenengo gauza da medikuaren aholkuak jarraitzea (kasu batzuetan beharrezkoa da farmakoak hartzea kolesterola jaisteko) eta oso gomendagarria da dietista-nutrizionistarenera joatea (ziurrenik, elikadura-ohiturak aldatzea; baliteke horrela tratamendu farmakologikoa saihestea). Dieta osasungarria jarraitzea eta erretzen usteari oinarrizkoak dira hiperkolesterolemia tratatzeko (odoleko kolesterola balio normalak baino handiagoa izatea). Beharrezkoa da frutak, barazkiak eta ortuariak, lekak, osoko zerealak (osoko ogia, osoko pasta, osoko arroza bezala) eta fruitu lehorrak gehiago kontsumitzea. Era berean, komeni da hestebeteen, haragi gorrien, edari alkoholikoen, edari azukredunen, saltsen eta premiarik gabeko elikagaien kontsumoa murriztea. Erretzen usteari dagokionez, lehenengo urratsa da, berriro ere, medikuari laguntza eskatzea. Horrela, arrakasta-aukerak hamar bider handiago izan daitezke.