Erosketa modu jasangarriagoan egin nahi zenuke? Ondorengo jarraibideei jarraituz, posible da.
Berrerabiliz gero, zure erosketan erabilera bakarreko ontziak murriztu ahalko dituzu. EROSKIn, erraz jartzen dizugu:
- Animatu zaitez solteko barazki eta frutak aukeratzen eta eraman itzazu sare berrerabilgarrian, gure dendetan aurkitu ditzakezu.
- Gure produktu freskoen eta in situ sukaldearen salmahaietan ere solteko produktuak zure tuperrean jartzeko eska dezakezu. Ez ahaztu garbituta ekarri behar duzula eta zuk nahi duzun produkturako egokia izan behar duela (zure ardura da, 7/2022 Legearen arabera).
- Zure erosketa etxera eramateko errafiazko poltsa berrerabilgarriak edo telazko poltsa solidario berrerabilgarriak Eta, jakina, jada poltsa berrerabilgarriak baldin badituzu, ez ahaztu ekartzeaz!
Birziklatzeak lehengaiak, energia eta ura aurreztea eta berotegi-efektuko gasen emisioak murriztea dakar. Produktuak eta materialak hondakin bihurtzea ekiditen dugu, guztiz berriak diren beste batzuk sortzen baititugu; hala, beren bizitza erabilgarria luzatzen eta planetako baliabide naturalak babesten laguntzen dugu.
Zalantzarik gabe, birziklatzearen onurak sekulakoak dira, eta hori lortzeko lehen urratsa zure etxean ematen da, hondakin bakoitza dagokion edukiontzian behar bezala bereizita. Baina batzuetan ez dugu argi izaten bakoitza non bota behar den. Jarraian, edukiontzi bakoitzera zer bota behar den errepasatuko dugu:
Edukiontzi horia
Edukiontzi horira botilak eta plastikozko ontziak, metalezko ontziak eta brikak bota behar ditugu, hala nola:
- Plastikozko botilak
- Kontserba eta edarien latak
- Plastikozko eta metalezko tapak eta tapoiak eta txapak
- Aluminiozko erretiluak
- Film-papera eta aluminio-papera
- Aerosolak
- Desodoranteen poteak
- Plastikozko poltsak (zabor-poltsak izan ezik)
- Terrinak eta jogurten estalkiak
- Brikak: esnea, zukuak, zopak, etab.
- Kortxo zurizko erretiluak
- Hortzetako pasta hodiak
- Zeramikazko ontziak
- Fruta eta barazkien zurezko ontziak
- Ardo eta edari mozkorgarrien zurezko ontziak
Eta, gogoratu: edukiontzi horira ontziak bakarrik bota behar dira. Plastikozko edo metalezko beste hondakin batzuk, hala nola jostailuak edota sukaldeko lanabesak, hurbilen duzun puntu berdera eraman behar dituzu.
Edukiontzi urdina
Edukiontzi urdinera papera eta kartoizko kaxak bakarrik bota behar dira: elikagaien ontziak, oinetakoen kaxak, izoztutako produktuen ontziak, biltzeko papera, eguneroko papera, etab.
Kuboan lekua aurrezteko eta edukiera handitzeko trikimailu txiki bat ontziak edo kaxak tolestea eta konprimatzea da, zimurtu beharrean. Horrela errazago bereiziko dituzu.
Edukiontzi marroia
Organikoen edukiontzi horretara janari-hondarrak bota behar dira, hala nola fruta-larruak, arrain-hezurrak, landareak, arrautza-azalak edo hondarrak, baita erabilitako ezpain-zapiak eta sukaldeko papera ere. Hondakinak edukiontzi horretan botatzeko, erabili beti konposta egiteko zabor-poltsak.
Edukiontzi berdea
Edukiontzi horretara beirazko botilak (ardoa, cava…), beirazko flaskoak (hala nola lurrin edo perfumeenak) edo elikagaien potoak (marmeladak, kontserbak, etab.) bota behar dira.
Adi, oso garrantzitsua da beira eta kristala bereiztea! Edukiontzi horretara beira bakarrik bota daiteke. Edalontzi, baxera, ispilu eta antzekoen kristalak hurbilen duzun puntu berdera eraman behar dituzu.
Hondakinen 7/2022 Legearen 55. artikuluak kontsumitzaileari erabilera bakarreko plastikozko ontzien prezioaren berri emateko betebeharra ezartzen du IV-A Eranskinean. Betebehar hori errespetatu behar duten ontziak honako hauek dira: edarien edalontziak, tapak eta tapoiak barne, eta berehala kontsumitzeko janarientzako ontziak, in situ edo eramateko, normalean ontzian bertan kontsumitzen direnak eta kontsumitzeko prest daudenak, ondoren prestatu beharrik gabe, kozinatu edo berotu beharrik gabe, alegia. Hau da, prestatutako entsaladak, postre indibidualak, prestatutako janaria, etab.
Hori dela eta, horrelako produkturen bat edo antzekoren bat erosten baduzu, zure erosketa-tiketean ikusi ahalko duzu PSPan ontzi horien prezioa sartuta dagoela eta dendan edo web-orrian kontsulta dezakezula.
Hain zuzen, prezioak honako hauek dira:
- 0,10 € jogurtetan, postreetan, fruta-pureetan, hestebeteetan, kafe-edalontzietan eta antzekoetan.
- 0,30 € prestatutako entsaladetan, moztutako frutan, gozogintzan, sushian eta antzekoetan.
Ontzi mota horiek murrizten laguntzeko, janaria prest eramateko zure tuperra ekartzen baduzu, in situ sukaldaritzaren saileko salmahaian 0,30 € deskontatuko dizkizugu, hau da, erabilera bakarreko plastikozko ontziaren kostua, produktuaren prezioan sartuta dagoena.
