Bere nutrienteak esnearenak baino hobeto asimilatzen eta aprobetxatzen dira, bakterio azidolaktikoen ondoriozko hartzitzeari esker.

Jogurta trinkotasun erdisolidoko esneki bat da; esnea hartzitu egiten denez, “hartzitutako edo azidifikatutako esnea” ere esaten zaio. Balio biologiko handiko proteina ugari du, erraz asimilatzen den kaltzioa, B taldeko bitaminak (batez ere B2) eta A eta D bitamina lipodisolbagarriak. Laktosari intolerantzia diotenek ere kontsumitzen dute.

Jogurta egiteko, esne pasteurizatu eta homogeneizatuari bakterio edo mikroorganismo batzuk gehitzen zaizkio (batez ere Streptococcus thermophilus eta Lactobacillus bulgaricus; merkatuan beste batzuk ere badauden arren, hala nola: Lactobacillus casei imunitass, Lactobacillus acidophilus 1, lactobacillus casei shirota, Bifidobacterium bifidus), 40-45ºC inguruan bere osagaiak nutritibo bihurtzen dira:

Laktosa (esnearen berezko azukrea) azido laktiko bihurtzen da, horrek azidifikazioa eragiten du eta esnearen proteinak koagulatu egiten dira.

Koipeek eta proteinek aurredigestioa jasaten dute eta gure organismoarentzako substantzia xumeago eta digestioa egiteko errazago bihurtzen dira.

Prozesu horiei guztiei esker, jogurta esne likidoa baino errazago digeritzen da eta amaierako zaporean, aroman eta trinkotasunean eragina dute.

Nutrizio-balioa

Esnearen oso antzekoa du, esnekia baita; laktosa da salbuespen bakarra, gutxieneko kontzentrazioa baitu azido laktiko bihurtu ondoren.

Balio biologiko handiko proteina ugari du, erraz asimilatzen den kaltzioa, B taldeko bitaminak (batez ere B2 eta erriboflabina) eta A eta D bitamina lipodisolbagarriak. Koipe edukiari eta A eta D bitaminei dagokienez (koipearekin batera egoten dira), jogurt motaren araberakoak dira, hau da, osoa, esnegain gehiagokoa, gaztaduna edo gabea edo gaingabetua izatearen araberakoa, eta gehienak gantz aseak dira.

Bere balio kalorikoa koipe kopuruaren araberakoa da, baina baita egiteko prozesuan beste osagai batzuk gehitu izanaren edo ez izanaren araberakoa ere: azukrea, edulkoratzaile ez kalorikoak, marmelada, fruta freskoak edo lehortuak, zerealak, fruitu lehorrak, etab.).

Kontsumitzearen abantailak eta desabantailak

Jogurtaren nutrienteak esnearenak baino hobeto asimilatzen eta aprobetxatzen dira, bakterio azidolaktikoen hartzidurari esker. Laktosarekiko jasanezintasuna duten gehienek eguneroko dietan har ditzakete, jogurtetan laktosa azido laktiko bilakatzen baita, eta, beraz, laktosa oso gutxi dute.

Beherakoa izan edo oka egiten jardunez gero gomendagarria da, baita digestioa egiteko arazoa dutenentzat ere (bifido aktiboekin hartzitutako esneak, “bio” deitutako jogurtak, ez dira hain azidoak eta batzuetan ohiko jogurtak baino hobeto jasaten dira). Behi-esnearen proteinari alergia diotenek ez dute hartu behar.

Etiketatzea eta kalitatea

Ontzietan eta etiketetan agertu beharrekoak hauek dira: produktuaren izena, produktuaren eduki garbia, kontsumitzeko data, kontserbatzeko baldintza bereziak eta fabrikazio lotea. Etiketan bere eduki kalorikoa eta nutrizionala jarri beharrik ez dagoen arren, askok jartzen dituzte.

Saltokian hozkailuan egon behar da, ontzia ongi egon behar da, deformatu gabe eta kolperik gabe. Ezinbestekoa da etiketari eta kontsumitzeko datari begiratzea.

Produktu honek hotza behar du kontserbatzeko, beraz, hozkailuan (0-4ºC) eduki behar da kontsumitu arte.