EROSKIn sare berrerabilgarriz egindako poltsa berria atera dugu, pisura erosten diren fruta eta berduretan alternatiba izan dadin; orain dagoena erabilera bakarreko plastikozkoa baita; horrela, zuek kontsumo ohitura iraunkorragoak hartu ahalko dituzue. Sarezko poltsa berriok garbitu egin daitezke, eta gutxienez hogei aldiz ere erabili. Eskura daude supermerkatu batzuetan, eta pixkanaka sare komertzial osora zabalduko dira.

Plastikozko poltsak erabiltzen diren bezalatsu erabiltzen dira: bezeroek pisura erosi nahi dituzuen frutak eta berdurak sartzen dituzue, zeina poltsek dakartzaten soka batzuekin itxi baitaiteke, eta, balantzan jarrita, bakoitzari bere etiketa ezartzen diote ordainlekuan dagokiona ordaintzeko. Itsasgarria erraz kentzeko modukoa da erosketa amaitzean, eta sarezko poltsa garbitu ere egin daiteke beharrezkoa bada.

EROSKIn lanean dihardugu gure produktuak eta dendak gero eta iraunkorragoak izan daitezen. Ekimen berri honen aurretik, beste hobekuntza batzuk egin ditugu fruten atalean; besteak beste, pisura saltzen diren erreferentzien kopurua handitu dugu —dagoeneko %60 baino gehiago jartzen da salgai era horretara—, eta EROSKI Natur gure markako fruten eta berduren plastikozko erretiluak ordezkatu ditugu FSC® zigilua duten paperezkoekin. Gaur egun lanean dihardugu urte honetan erabilera bakarreko plastikozko poltsa guztiak kendu eta konpostagarriak eta jatorri berriztagarrikoak diren beste batzuk ipintzeko.

2019aren hasieran, irtenbide iraunkorren sorta zabal bat ezarri genuen, erosketetan erabili ohi den plastikozkoa ordezkatzeko. Hala, FSC® zigilua (Forest Stewardship Council) duen paperezko poltsa misto berri bat atera dugu. Horrela ziurtatzen dugu era iraunkorrean kudeatutako basoetatik datorrela paperaren zuntza, eta landare jatorri berriztagarriko materialekin egina dagoela; gainera, zabor organikoaren poltsa gisa erabil daiteke. Erabat birzikla daitekeen beste poltsa berrerabilgarri bat ere atera dugu, lehengaiaren %55 gutxienez plastiko birziklatua duena. Soluzio iraunkor berri horiekin batera, hor izango ditugu lehen ere eskaintzen ditugun alternatibak, hau da: poltsa berrerabilgarria —%70 material birziklatuz egina— eta telazko elkartasun poltsa berrerabilgarria, zeina erraz tolesteko modukoa baita, sakelan edo autoan edukitzeko; gainera, poltsa mota horrek batu egiten ditu ingurumena eta elkartasuna, bera salduta lortzen den dirua elkartasun kausetarako erabiltzen baita.

Plastikoaren kontsumoa 100 tona gutxitzea urtean

Gutxienez hogei aldiz erabil daitezkeela kalkulatzen bada ere, lau aldiz bakarrik erabilita jada gutxitu egingo litzateke erabilera bakarreko plastikoen kontsumoa. Bezero guztiek sarezkoak erabiliko balituzte plastikozkoen ordez, plastizkokoen 50 milioi gutxiago erabiliko lirateke gure dendetan. Horrek esan nahi du 100 tona plastiko gutxiago erabiliko litzatekeela.

Plastikoaren erabilera gutxitzeko neurriak

EROSKIn lanean ari gara sektoreko liderra izateko plastikoaren inpaktua gutxitzen dutenen artean. Gure helburua da 2025era iristerako gure ontzietan erabilera bakarreko plastiko tonak %20 behintzat gutxitzea.

Alde horretatik, zenbait neurri jarri ditugu martxan EROSKIn. Hala, kontsumitzaileei aukera emango dizuegu zuen ontzi berrerabilgarriak erabiltzeko —hala nola jakiontziak eta taperrak— harategiaren eta arrandegiaren ataletan.

Gainera, plastikoaren kutsaduraren aurkako estrategian, eusten diogu gure ontzi guzti-guztiak 2025erako ekodiseinatzeko konpromisoari; hala, asmoa da ordurako denak birziklagarriak izatea, gehiegizko ontziratzeak eragoztea eta material birziklatuen eta jatorri berriztagarrikoen erabilera indartzea.

Ingurumenaren aldeko konpromisoa

Kooperatiban konpromiso sendoa dugu ingurumenarekin; alde horretatik, zenbait ekimenetan dihardugu, ingurunean gure jarduerak dakartzan kalteak txikitzeko. Helburuak argiak dira, baliabideak modu iraunkorrean erabiltzea, ingurumen aztarna gutxitzea, hondakinak ekonomia zirkularraren ereduari jarraituz kudeatzea, bioaniztasunari eustea… Eta halaxe jasoak ditugu Osasunaren eta Iraunkortasunaren alde berrituriko konpromisoetan. Iaz aurkeztu zituen konpromiso horiek, eta horien haritik doaz erosketa poltsa iraunkorragoen soluzio berri hauek.