Arrain freskoen arloan, ekitaldi honetan Skrei bakailaoa merkaturatzen hasi gara, orain Kantauriko antxoa daukagu, gero hegaluzea izango da eta pixkanaka MSC zigilua duten espezie gehiago sartuko dugu. Gainera, gure markako hegaluze-kontserba guztietan, nahiz beirazko ontzietan nahiz latan, kanaberaz egiten den artisau-arrantzatik datorren hegaluzea besterik ez dugu erabiltzen, eta ontzi horietan guztietan amu bat ageri den zigilu bat jartzen dugu, produktu hau iraunkorrena dela ikusi ahal izateko.

Zer esanahi du Eroskirentzat?

MSC zigilua arrantza iraunkorreko gure politikaren barruan sartzen da eta gure ingurumen-ekintzako politikan definitu bezala, biodibertsitatea zaintzeko dugun konpromisoan ere bai. Ziurtagiri honek eta beste ekimenek (hegaluzearena, kontserbako atunarena…) eragin zuzena dute arrandegian produktuak erosteko orduan. Etiketan ere eragina dute, ‘MSC’ zigiluaz gain dendako karteletan edo ontzietan produktuaren jatorri iraunkorraren inguruko azalpenak baitatoz.

Zer puntu lantzen dituzue hornitzaileekin?

Oro har, produktuaren kudeaketa arduratsua sustatzen dugu eta bere ingurumen-kudeaketa kontrolatzeko ikuskaritzak egiten ditugu. Produktu motaren arabera, eskatutako praktika onak eta egindako kontrol motak aldatu egiten dira. Adibidez, kontserbako atun hornitzaile guztiekin akordio bat sinatu dugu eta hitza ematen dugu ISSFren printzipioen arabera hornituko garela (Arrantza Iraunkorraren Nazioarteko Fundazioa), eta AZTIk eta MRAG Américas-ek kanpoko ikuskaritzak egiten dituzte eskakizun horiek betetzen direla bermatzeko. Antzeko ekintzak egiten dira MSC ziurtagirirako edo kanaberaz arrantzatutako hegaluzearen kasuan.

Beste atal batzuetan ere hornitzaileak iraunkortasun irizpideen arabera hautatzen ditugu, eta hona hemen adibideetako batzuk: zelulosa-produktuetan eta zurezko altzarietan FSC ziurtagiria eskatzen dugu, horrek esan nahi du baso-ustiapen iraunkorretik datozela; ehunei dagokienez, kotoi organikoa erabiltzen da artikulu batzuetan edo drogerian dauden etxerako zabor-poltsa batzuk material konpostagarriarekin egindakoak dira.

Tokiko hornitzaileen alde ere egiten dugu, horrek ingurumen-eragina murrizten du banaketa-fasean, eta gure tokiko erkidegoetan eragin ekonomiko eta sozial positiboa du.

Zer eragin du horrek gure arrandegietara eta dendetara iristen den produktuan?

Kontserbako atunaren kasuan, esaterako, ez dira gainuztiatutako espezieak erosten, hala nola, “Patudoa” (Thunnus Obesus) FAO eremutik datorren arraina, atuna gainuztiatutako eremukoa, eta arrantzatutako bolumen osoaren %10 banku librekoa da (FADetan arrantzatu gabea – arrainak agregatzeko sistemak). Hartutako konpromiso guztien xedea da gure itsas-baliabideen ustiaketa iraunkorra egitea.  Gainera, kontserbako atunaren ontzia ekodiseinatu da eta inguruan eramaten zuen sleeve motako paperezko papera kendu eta lataren gainean inprimatu da zuzenean. Honek ere iraunkortasunari mesede egiten dio, paper gutxiago kontsumitzen baita.

Hegaluzearen kasuan, gure markentzako kanaberaz arrantzatua baino ez da erosten. Praktika hau hautazkoagoa eta iraunkorragoa da, ez baitira beste espezie batzuk arrantzatzen nahi gabe eta itsasoaren hondoa ez da narriatzen, arrantza masibo motekin gertatzen den bezala eta horrek gero arrantzaren kalitatean eragina du. Gainera, arrainarekin egiten den prozesamendua ohiko metodoaren arabera egiten da eta arrantzatzen denetik ordu gutxira; horrek eragina du lehenengo kalitateko produktu goxo, zaporetsu eta fresko-freskoan.

Arrantza iraunkorreko praktika hauek ziurtatzen ditu MSCk, izan ere “MSC” ekoetiketa duten arrain freskoak arrantzaleku iraunkorretatik datozela eta trazabilitatea bermatuta dutela ziurtatzen dute.

Zer ondorio ditu gure logistikan edo gure dendetan?

Produktuaren trazabilitatea ziurtatzeko, logistika prozesua eta dendako kontserbazio-prozesua egokitu dira, horrela arrainaren jatorria beti bermatzen baita.

Kontserbako atunaren kasuan, gainera, ontzia ekodiseinatu denez, pallet bakoitzeko 720 ontzi primario gehiago ditugu, hau da, logistika optimizatu egin da eta, ondorioz, erregai gutxiago erretzen da eta errepideko garraioaren isurtze gutxiago dago.

Era berean, azpimarratu beharra dago arrandegiko gainerako produktuekin egiten den bezala, saldu gabe geratzen den MSC arraina baimendutako kudeatzaile batek aprobetxatzen duela maskotentzako pentsua egiteko. Ekonomia zirkularraren adibide hau bat dator gure produktuen bizi-ziklo osoaren iraunkortasuna hobetzeko dugun konpromisoarekin.

Bezeroen sentsibilizazioa garrantzitsua da ziurtagiri hauek ezagutu ditzan. Nola egin hori?

Dendetan bertan, dela artatzen dutenen bidez (aurrez prestatuta baitaude) dela informatzeko produktuen bidez (kartelak, etiketak…). Baita Bezeroaren Ikasgeletako trebakuntza-saio presentzialen, aldizkariaren edo Eroski Consumer webgunearen bidez ere, ziur baikaude egiten ari garen hau guztia pixkanaka barneratuko dutela kontsumitzaileek eta beren erosketak egiterakoan hartutako erabakien bidez ekoizpen-sektoreetako praktikak baldintzatu ditzakete.

Ingurumen-iraunkortasuneko ekimen hauekin klima-aldaketan eragin txikiagoa izan nahi dugu, naturako baliabideak babestu eta modu iraunkorrean erabili nahi ditugu, ekonomia zirkularreko ereduen arabera kudeatu nahi ditugu hondakinak eta biodibertsitatea zaindu nahi dugu. Horiek guztiak Garapen Iraunkorreko 17 Helburuetako batzuk dira eta hori da munduko iraunkortasunaren ibilbide-orri berria.