Eusko Label arkumea Arabako Errioxako ardo beltzarekin gisatuta

Arkume-zatiei gatza eta piperra bota eta irineztatu egingo ditugu eta kazola batean gorrituko ditugu, oliba-olioarekin kozinatuko ditugun tokian. Bi aldeetatik ondo gorrituko ditugu. Gero, tipula, azenarioak eta baratxuri-aleak botako dizkiegu. Barazkiak bigundu direla eta zukuak kazolan karamelizatzen hasi direla ohartzerakoan, Arabako Errioxako ardo beltza botako diogu eta 5 minutuz loditzen utziko dugu. Belar usaintsuak gehituko ditugu, ura botako dugu haragia estali arte eta kazola estalita bi orduz egosiko dugu (presio-eltze batean prestatzen badugu, ordubete nahikoa izango da). Eusko Label arkume-zatiak bigundu direla egiaztatuko dugu, kazolatik atera eta epeltzen utziko ditugu, hezurgabetu eta gorde egingo dugu. Salda iragazki edo txino batetik pasatuko dugu, nahiko presio eginez, barazkiek funts guztia aska dezaten. Puregailu batetik pasa daitezke ere, baina kasu horretan saltsaren kolorea ez da hain distiratsua izango, zukuak bakarrik igarota lortuko duguna bezalakoa. Saltsa lodiagoa nahi badugu, sutan loditzen utziko dugu nahi dugun trinkotasuna emateko, edo, bestela, koilaratxokada bat arto-irinarekin lodituko dugu. Gatz-puntua doituko dugu eta listo, saltsa zerbitzatzeko prest dago! Muntatzeko uztai batekin anoak prestatuko ditugu, anoen gainean patata-pure bat eta sagar egosien konpota bat jarrita.