Oilasko eta indioilar broxetak barbakoan.

Oilasko broxetak egiteko: 1.-Txikitu baratxuriak fin-fin, edo erabili baratxuri birringailua. Motrailu batean, birrindu baratxuriak gatz apur batekin eta oliba-olio birjina estraren turrustatxo batekin. Gehitu olioa apurka-apurka, baratxuriekin emultsionatu eta alioli lodia eratu arte. Gehitu perrexil freskoa xehe-xehe eginda eta olio apur bat. Nahastu baratxuriarekin. Gehitu ardo zuria nahierara, eta eragin ongi nahasteko. 2.-Ebaki oilaskoa 3 eta 4 cm arteko dadotan gutxi gorabehera, edo mokadu tamainan. Kontuan hartu beroarekin apur bat murriztuko dela tamaina. 3.-Gehitu baratxuri, perrexil eta ardo nahastea oilaskoari. Estali osorik, gatzpipertu nahierara, eta gorde hozkailuan 12 orduz gutxienez, oilaskoak zapore guztiak har ditzan. Indioilar broxetak egiteko: 4.-Motrailu batean, bota espezia hautsak eta oliba olio birjina estra. Nahastu orea lortu arte. Bota olio gehiago behar ahala. Gehitu martorri freskoa xehe-xehe eginda, eta nahastu. Bota limoi edo lima baten zukua, eta nahastu. 5.-Ebaki indioilarra 3 eta 4 cm arteko kubotxoetan gutxi gorabehera, edo mokadu tamainan. Kontuan hartu egitean apur bat murriztuko dela haien tamaina. 6.-Gehitu motrailuko orea indioilarrari. Estali osorik eta gehitu gatz apur bat soilik, espeziekin jadanik ongi gozatuta egongo delako, eta gorde hozkailuan 12 orduz gutxienez, indioilarrak zapore guztiak har ditzan. Bi oilasko eta indioilar broxeta motetarako: 7.-Garbitu eta ebaki barazkiak laukietan eta fruta dadoetan, Cherry tomateak izan ezik; horiek osorik sartuko dira broxetetan. Garbitu barrengorriak zapi heze batekin lurra kentzeko, kendu oinari zatitxo bat, eta ebaki erditik. 8.-Askotariko broxetak egin daitezke: Oilasko nahiz indioilarrezkoak, piper gorria, berdea eta horia tartekatuta. Oilasko nahiz indioilarrezkoak, kuiatxoa, tipula eta barrengorria tartekatuta Oilasko nahiz indioilarrezkoak, anana eta Cherry tomateak tartekatuta. Barbakoan erretzeko prest.