Espaguetes ao queixo azul con espinacas

A pasta é un alimento básico dentro dunha dieta sa, especialmente se é integral, xa que achega a enerxía necesaria para desenvolver as tarefas diarias. Como admite moitas combinacións e é doada de preparar, nunca falta na despensa dos fogares. Componse fundamentalmente de hidratos de carbono complexos e achega moi pouca cantidade de graxa. O segredo para que non resulte un prato excesivamente calórico é acompañala con prebes lixeiros de tomate e verduras. Non obstante, a cantidade de pasta pódese axustar ás necesidades de cada dieta, polo que este alimento pódeo degustar calquera persoa, incluso no caso de diabetes ou necesidade de control do peso. A salsa de queixo azul que acompaña neste caso a pasta contén ingredientes bastante graxos e, xa que logo, cun alto valor enerxético. O seu intenso sabor combina á perfección co da pasta, que ao ter un gusto máis neutro permite realizar estes contrastes. Tanto o queixo coma a nata son fonte de graxa saturada, que se desaconsella para as persoas con problemas cardiovasculares ou de hipercolesterolemia, e para todas aquelas que deban seguir unha dieta escasa de graxa. Mais o queixo tamén nos dá unha cantidade insuperable de calcio, polo que contribúe a manter fortes os ósos e a previr a osteoporose. As espinacas danlle un toque vexetal ao prato e, canda a cebola e mais os pementos, enriquéceno con fibra, vitaminas e minerais. Entre os nutrientes que achegan as espinacas salientan os minerais, como o calcio e mais o ferro, e vitaminas como a vitamina A ou o ácido fólico. Polo seu alto contido en oxalatos están desaconselladas en casos de litíase renal.