Aragoiko bildotsaren tournedóa txili-txilindron erako pil-pilarekin

Bildots-hankak egosteko: Sartu osagai guztiak lapiko batean eta jarri irakiten ordu bat eta erdiz, hankak samur dauden arte. Iragazi eta gorde geroko. Gorde hankak zuku apur batekin beste plater batzuk egiteko, errezeta honetan, egosketa-ura besterik ez baitugu erabiliko. Txili-txilindron saltsa egiteko: Jarri olioa berotzen eltze baxu batean eta erantsi zanpatutako baratxuriak. Arin frijitu direnean, kendu lapikotik eta gehitu tipula baratxuri-usaineko olio horretan. Tipula gorritu orduko, erantsi piperrak eta frijitu arinki. Erantsi urdaiazpikoa, frijitu apur bat eta gehitu tomatea eta harissa saltsa. Utzi sutan pixka bat loditu arte. Busti saltsa bildots-hanken egosketa-saldarekin eta utzi irakiten 20 minutuz. Pasatu iragazki fin batetik pil-pil testura lortu arte eta beharrezkoa bada, bota gatz gehiago. Gorde bero zerbitzatzeko unera arte. Baratxuri erreen purea egiteko: Sukaldeko robot baten laguntzaz, birrindu baratxuri-buruak eztiarekin eta sojarekin testura krematsu bat lortu arte eta sartu nahasketa biberoi batean. Aragoiko bildotsaren tournedóak prestatzeko: Zartagin oso bero batean, urtu gurina erromero-adartxoarekin. Jarraian, erantsi gatzaz eta piperraz ondutako tournedóak zartagin handian. Koilara baten laguntzaz, glasatu tournedóak zartagina arinki okertuz eta bildots-puskak goiko aldetik behin eta berriro bustiz. Mahaikideen gustuak kontuan hartuta, irauli haragia eta jarraitu glasatzen nahi duzun haragi-puntua lortu arte. Teknika honekin, urre-koloreko azal kurruskaria lortuko dugu kanpotik eta arrosa-koloreko puntu uniformea barrutik. Utzi jalkitzen toki bero batean hainbat minutuz, puntu egokian dagoen arte. Amaiera eta aurkezpena: Jarri tournedóa plater epel baten erdian eta marraztu hiru zirkunferentzia biberoian gordeta duzun baratxuri-purearekin. Bete zirkulu horiek txili-txilindron erako pil-pilarekin.