Askotariko pastak

Espageti beltzak txibia-tintarekin eta txirlekin: Kazola batean, jarri ura eta gatza irakiten, eta bor-bor hasten denean, jaitsi su ertainera edo ertain-bizira eta egosi pasta bilgarrian ageri diren argibideei jarraikiz.  Pasta irakiten ari den bitartean, zabaldu olio apur bat 22 cm inguruko diametroa duen zartagin batean, eta erregosi baratxuria eta pipermina su bizian. Baratxuria gorritu denean, gehitu txirlak eta salda, eta jaitsi sua ertain-bizira, txirlak ireki eta likidoa ia-ia guztiz lurruntzen den arte.   Gehitu perrexila eta eragin.   Pasta bere puntuan dagoenean, xukatu eta sartu berriz kazolan, gehitu txirlak eta nahastu guztia ongi.   Egin berritan zerbitzatu.   Trikimailua: txirlei puntu are bereziagoa emateko, oliotako bi tomate lehor gehitu ditzakezu, ongi txikituta, perrexilarekin batera.  Pasta puttanesca eran: Ebaki antxoak zati txikitan eta xehatu baratxuri-atala. Bota oliba-olioa zartagin batean eta, su motelean, gehitu antxoak. Egurrezko koilara batekin txikitu, eta utzi sutan disolbatu arte. Jarraian, gehitu baratxuri xehatua eta egin 12 segundoz gutxi gorabehera. Ongi zaindu behar dugu, baratxuria gehiegi txigortzen bada saltsa garraztu eta zaporea hondatu dezakeelako. Gehitu tomatea gatz apur batekin, igo sua ertain-bizira, irakiten hasi arte, eta segundo pare baten ondoren jaitsi berriz eta egin su motelean 25 minutuz gutxi gorabehera, edo tomateak urritu arte. Saltsa loditu denean, gehitu oliba-olio koilarakada bat, oreganoa, kaparrak eta oliba beltz txikituak. Saltsa amaitu baino minutu batzuk lehenago, egosi pasta eltze handi batean, ur ugaritan eta gatzarekin. Ura irakiten hasten denean, gehitu pasta eta utzi egosten fabrikatzaileak adierazitako denboran. Denbora hori igarotakoan, iragazi eta saltsarekin nahastu. Hautseztatu gazta parmesanoarekin.