Croquetas de marisco

Picamos a cebola e mais o allo á brounoisse e rustrímolas en aceite moi quente. Engadímoslle a fariña e cando estea ben mesturada vertémoslle o leite, que previamente quecemos ata chegar ao punto de fervor e logo sazonamos coa reladura de noz moscada. As colas de lagostino pelámolas e picámolas en cru, e despois reservámolas. Mantense a lume medio forte e sen deixar de remexer incorporámoslles as colas de lagostino ben picadas, o pirixel, o sal e a pementa. Séguese remexendo sen baixar o lume ata obter unha pasta cremosa e homoxénea. Chegado ese punto, esténdese a pasta sobre unha placa para arrefriar a temperatura ambiente. De que estea fría córtase en porcións para croquetas, dándolle a forma e o tamaño que se desexe, segundo o gusto. Batemos os ovos e pasamos as croquetas, primeiro pola fariña, despois polo ovo e finalmente polo pan relado, e a seguir frixímolas nunha tixola con abundante aceite moi quente. Sácanse as croquetas para unha bandexa ou un prato con papel de cociña para eliminar a graxa de frixir, e despois pásanse á bandexa ou ao prato de servizo acompañando cunha salsa de tomate quente.