Eusko Label hanburgesa kristal-ogian

Baratxuri-ale biak zuritu eta xehe-xehe moztuko ditugu brounoisse eran (kubo txikitxoetan) perrexil hostoekin batera. Jarraian, ogi mamia esnearekin beratzen jarriko dugu, ore krematsua osatu arte. Baratxuri atalekin, perrexilarekin eta ogi- eta esne-orearekin, Eusko Label txuletako haragi xehatua nahastuko dugu eta gatz-piperrez onduko dugu. Gero, nahastea 8 zatitan banatu eta hanburgesak moldatuko ditugu. Hanburgesak azalera itsasgaitz batean kozinatuko ditugu, dela zartagin batean, dela sukaldeko plantxa batean, olio tanta batzuekin. Su ertainean egiten dira, 4 minutuz alde bakoitzetik. Bukatzeko, hanburgesa-ogiak ireki, barruko parteak plantxan edo zartagin itsasgaitz batean arinki txigortu eta gainean hanburgesa eta pikillo piper-beloa jarriko ditugu. Pikillo piper-beloa prestatzeko; zartagin batean pikillo piperrak eta baratxuri-ale bat salteatuko ditugu, oliba-olio koilarakada bi eta gatz eta azukre apur batekin. Ondoren, urarekin batera txikitu, landare-gelatina hautsa gehitu, irakiten jarri eta gatza gehituko diogu. Nahasketa hori laberako plaka batean botako dugu, gelatina ondo osa dadin. Ore-ebakitzaile bat baliatuz, hanburgesen neurri bereko zatiak egingo ditugu. Azkenik, beloa hanburgesa bakoitzaren gainean jarri eta saltsa ezberdinak, letxuga, tomateak eta abar gehituko dizkiogu eta bukatzeko, labetik atera berri dugun kristal-opiltxoetan zerbitzatuko ditugu.