Urraburua labean caponata eta arrozarekin

Caponata prestatzeko, jarri koilarakada bat oliba olio birjina estra lapiko batean eta sueztitu fin txikitutako tipula erdi, kolorea hartu gabe. Biguntzen denean, gehitu zuritutako eta zatitutako tomatea eta gatz apur bat. Utzi su ertainean 15 minutuz. Gorde.  Bitartean, moztu berenjena kuboetan (puntak kenduta) eta utzi iragazki batean gatzarekin 30 minutuz, mingostasuna gal dezan. Denbora igarotzen denean, garbitu ondo iturriko uretan eta lehortu.  Era berean, utzi mahaspasak uretan, hidratatu daitezen.  Berotu labea 180ºC-tan goitik eta behetik.  Katilu batean, nahastu berenjena, kubo txikietan moztutako tipularen beste erdia, kuboetan moztutako piperrak, kaparrak, pinaziak, aldez aurretik beratutako eta xukatutako mahaspasak eta tipularekin kozinatutako tomatea.  Olio apur batekin bustitako laberako erretilu batean, jarri barazkien nahasketa eta bota ur baso bat eta oliba olio birjina estraren bi koilarakada haren gainetik. Laberatu 40 minutuz. 5 minutu falta direnean, nahastu ozpina eta azukrea (azukrea disolbatu arte) eta erantsi prestatzen ari diren barazkietan. Amaitu horiek erretzen, atera labetik eta gorde.  Olio apur batekin bustitako laberako erretilu batean, jarri urraburu osoa gatza eta piperbeltzarekin. Jarri erromero-adar batzuk haren sabelean eta sartu zenbait limoi-xerra trontzoan egindako mozketa batzuetan. Laberatu 20 minutuz.  Urraburua erretzen den bitartean, egosi arroza ur ugaritan baratxuri-ale batekin. Iragazi eta bota belar-gatza. Gorde.  Zerbitzatzeko, jarri urraburua caponata ohe baten gainean eta lagundu arroz apur batekin.