Azpizun, barrengorri eta perretxiko broxeta tipula eta anana chutney-arekin

Itsaspenaren kontrako zartagin batean oliba-olio pixka batekin zatitutako baratxuri-alea frijituko dugu, eta horitu aurretik perretxikoak eta barrengorriak botako dizkiogu gatz pixka batekin. Nahastea bi minutuz salteatuko dugu, zartagina sutik kendu eta epeltzen utziko dugu. Txahal-azpizuna kubo erregularretan moztuko dugu eta broxeta batean sartuko ditugu, perretxikoekin eta barrengorriekin tartekatuz. Aldez aurretik perretxikoak eta barrengorriak salteatu ditugun itsaspenaren kontrako zartagin berean kozinatuko dugu broxeta, olio eta gatz pixka batekin, biraka eta kanpotik modu berdinean kozinatuz. Broxetak salteatu direnean, zartaginetik atera eta zartaginera itsatsitako zukuei ardo zuri zurrustada bat, haragi-salda eta arto-irin koilarakada bat botako dizkiegu saltsa loditzeko. Broxeta saltsa horrekin zerbitzatuko dugu, eta tipula eta anana chutney-a gehituko dizkiogu. Tipula eta anana chutney-a egiteko: kazola batean brounoisse eran (karratu txikia) moztutako tipula salteatuko dugu zuritutako eta xaflatan moztutako ananarekin; horitzen hasten denean limoi-zukua eta jengibre pixka bat, kaiena  eta arroz-ozpin pixka bat botako dizkiogu. Dena batera egiten utziko dugu konpotaren loditasuna hartzen duen arte. Zatitxo batzuk al dente edukiko ditu. Amaitzeko, gatz-puntuan jarri eta osagarri freskagarria lortuko dugu, ukitu gazi-gozoarekin.