Feixóns con tomate

Lavamos os feixóns e poñémolos a remollo a noite anterior nunha pota ampla, cubertos por auga fría o dobre do seu volume. Ao día seguinte, na mesma pota, cocemos os feixóns cubertos coa auga do remollo e agregámoslles a cenoria pelada (pero enteira), o porro limpo e partido en dous anacos e a media cebola pelada e cortada en anacos grandes. Cando os feixóns estean cocidos, arredor de dúas horas desde que a auga empezou a ferver, separamos a cenoria, o porro e a cebola, pasámolos polo batedor e  volvémoslle engadir o pasado aos feixóns. Picamos finamente os allos e rustrímolos nunha tixola cun pouco de aceite de oliva. Antes de que collan cor engadimos o tomate pelado e cortado, rustrimos durante 10 minutos máis ata que o tomate perda o seu zume e quede reducido a un refrito. Pasamos esta salsa polo pasador de puré, deitámoslles o salteado de tomate aos feixóns e cocemos todo o conxunto durante uns 10 minutos a lume manso. Poñemos a punto de sal, agregamos un chorriño de aceite de oliva virxe, remexemos para que se unifique o prebe do cocido e servimos quente, unha vez que repousase durante uns 10 minutos coa tapa da pota posta para que non arrefríe.