Salsas Bechamel

Para cociñar bechamel sen gromos, primeiro elabórase o roux: coa manteiga desfeita, bótase a fariña dunha soa vez, déixase cociñar todo, sen que adquira unha cor torrada, removendo continuamente, e cando a fariña estea cociñada formando unha especie de papa homoxénea, apártase do lume ata arrefriar ou temperar. Ao mesmo tempo, quéntase o leite a altas temperaturas, sobre todo se é para grandes cantidades. Unha vez que o leite estea ben quente, bótase parte sobre o roux, que estará fóra do lume. Disólvese ben con esa pequena parte de leite quente, que proporcionará espesura, coa vara ou unha culler de madeira, ata que quede unha pasta fina. Este será o momento de volver a pór o cazo no lume, botar o resto do leite moi quente, pouco a pouco e sen deixar de mover, ata levar a ebulición e intentar que ferva de tres a cinco minutos. Así espesará sen gromos. Engádese sal, pementa e un pouco de noz moscada, ao gusto.