Barazkiz betetako kuiatxoak

Bi kuiatxoetako bat pistoa egiteko erabiliko dugu, eta bestea betetzeko. Betetzeko erabili behar duguna, xerra loditan zatitu eta 10 minutuz egosiko dugu gazitutako ur irakinetan. Denbora hori igarotakoan, xukatu eta koilaratxo batekin hustu egingo ditugu. Gero betetzeko utziko ditugu. Pistoa prestatzeko, lehenik eta behin tomateak ur irakinetan galdarraztatuko ditugu 2 minutuz. Ur hotzetan freskatu, zuritu eta kubotan zatituko ditugu. Beste kuiatxoa garbitu eta kubo txikitan zatituko dugu azal eta guzti, eta gauza bera egingo diegu tipulei eta piper berdeari. Baratxuriak xerratu egingo ditugu. Olioa kazola handi batean berotu, eta tipula sueztituko dugu gorritu gabe. Piper berdea, kuiatxoa, tomatea eta baratxuriak gehitu, 35 minutuz su motelean eduki, gatza eman eta gorde egingo dugu. Baliteke azidotasuna doitu behar izatea azukre pixka batekin. Pistoa iragazkian pasatuko dugu eta ateratzen zaion zukuarekin etxean egindako tomate-saltsa aberastuko dugu. Iragazitako pistoaren koilarakada banarekin beteko ditugu egosi eta hustutako kuiatxoak, eta tomate-saltsa pixka bat gainetik isuri ondoren, Mozzarella gaztarekin amaituko dugu. Aldez aurretik 180 ºC-raino berotutako labean sartuko ditugu gainerre daitezen. Bero zerbitzatuko ditugu, perrexil zatitu pixka bat gainean botata.