Cabaza ao forno con recheo

Lavamos moi ben as cabazas, cortámolas en sentido lonxitudinal, sacámoslles as sementes e baleiramos a parte que ten polpa. Nunha tixola refogamos a cebola canda o allo cortado en brounoisse (cadriños moi pequenos) e cando o rustrido estea case feito, poñemos na tixola os anacos que sacamos da cabaza e os cogomelos limpos e cortados, canda un chisco de xenxibre relado. Salteamos e, unha vez que estean as verduras cociñadas, poñemos a punto de sal e enchemos con esta mestura a cabaza oca. Esparexémoslle un pouco de mozzarella por riba e gratinamos durante 15 minutos a forno medio e con gratinador. Colocamos a bandexa na parte máis baixa do forno para que se cociñe tamén a casca da cabaza. Presentamos na mesa, para catro persoas, e servimos desde a mesma cabaza como se fose unha sopeira.