Txitxirioak ziazerbekin eta bakailaoarekin

Aurreko gauean, beratzen ipiniko ditugu txitxirioak. Bakailaoa 24 orduz gezatzen jarriko dugu, eta gutxienez 8 orduro aldatuko diogu ura. Bakailaoa uretik atera, azala eta hezurrak kendu, lehortu eta izpitu egingo dugu. Ziazerbak garbitu, xukatu eta zatituko ditugu. Eltze bat sutan jarriko dugu ur askorekin, eta olioaren erdia, baratxuri-atal osoak zuritu gabe eta ebaki bat eginik, eta tipula erdia zurituta gehituko dizkiogu. Irakitear dagoenean, txitxirioak gehitu eta su motelean egosten utziko dugu, estalirik, samurtu arte (2 ordu inguru). Jarraian, bakailaoa eta ziazerbak gehituko ditugu eta 10 minutuz-edo guztia batera egosten utziko dugu. Bitartean zartagin bat jarriko dugu sutan soberako olioarekin, eta bero dagoenean sua jaitsi, eta gainerako tipula botako dugu, irabiatzen dugun bitartean. Tipula samur dagoenean piperrautsa gehituko diogu, ondo eraginez, pikorrik ez sortzeko eta piperrautsa ez erretzeko. Ondoren, txitxirio-saldaren koilarakada batzuk gehituko ditugu, ondo nahastuko dugu dena, sua bizituko dugu eta minutu batez erregosiko dugu egurrezko koilara batekin nahastuz. Txitxirioen eltzean bota, nahastu, eta su motelean egosten utziko dugu 15 bat minutuz, eltzea estali gabe.