Inauterietako txigorkiak karamelu-hariekin

Ogia xerratan moztuko dugu, 2 zentimetro lodi xerra bakoitza, puntak kenduz, eta erretilu batean zabalduko dugu. Esnea berotzen jarriko dugu, azukrearekin, kanela-zotz batekin edo birekin, laranja-azalarekin eta limoi-azalarekin. Ongi irabiatuko dugu, zaporeak nahas daitezen. Su eztian egiten utziko dugu 10 bat minutuz. Esnea ogi xerren gainean iragazi eta gutxi gorabehera ordubetez utziko dugu pausatzen. Esneak ez baditu xerrak estali, ordu erdi igarotakoan buelta emango diegu. Xerrak irabiatutako arrautzetan pasatu eta ekilore-olioan frijituko ditugu. Doratu ahala, paper xurgagarrian jarriko ditugu. Ontzi batean azukrea eta kanela-hautsa nahastuko ditugu eta txigorkiak oraindik bero daudenean, nahastean busti, plater batera pasatu, eta pausatzen utziko ditugu almibarra bota dezaten. Txigorkien erdia soilik ere busti dezakegu nahastean eta beste erdia erregailu batekin karamelizatu, gainean azukre geruzatxoa jarri eta gero; bestela, azukrean soilik ere pasa ditzakegu. Karamelu-harietarako: Zartagin itsasgaitzean botako ditugu 100 ml ur eta 100 g azukre. Orduan soilik irabia daiteke nahasteko. Hortik aurrera, karamelua egiten ari garen zartagineko kirtenetik soilik mugi daiteke; izan ere, bestela karamelua kristalduko litzateke. Doratu denean, sutik kendu eta epeltzen utziko dugu. Loditzen denean, marrazki batzuk egingo ditugu paper sulfurizatuan edo laberako paperean koilara batekin edo sardexka batekin. Hozten utzi, eta gogor dagoenean kontuz bereiziko dugu. Txigorkiak dekoratzeko, erdian ebakia egin eta karamelu-hariekin egindako marrazkiak jarriko dizkiegu gainean.